धारणगाव जिल्हा परिषद शाळेत विद्यार्थी सुरक्षेवर पालक मेळावा; बिबट्यापासून बचावासाठी केले सखोल मार्गदर्शन - शाळेच्या भौतिक सुविधांवरही झाली महत्त्वपूर्ण चर्चाजिल्हा परिषद प्राथमिक शाळा, धारणगाव येथे आज दि. ११ नोव्हेंबर २०२५ रोजी विद्यार्थ्यांच्या सुरक्षेच्या संदर्भात एका महत्त्वपूर्ण पालक मेळाव्याचे आयोजन करण्यात आले. परिसरात बिबट्याचा वावर आढळून येत असल्याच्या पार्श्वभूमीवर, पालक आणि विद्यार्थ्यांनी घ्यावयाच्या काळजीबाबत या मेळाव्यात सविस्तर चर्चा करण्यात आली व महत्त्वाच्या सूचना देण्यात आल्या.या मेळाव्यात, बिबट्या प्रामुख्याने पहाटे आणि सायंकाळी सक्रिय असल्याने त्या वेळेत मुलांना एकटे बाहेर सोडू नये, असे आवाहन पालकांना करण्यात आले. तसेच घराचा परिसर स्वच्छ व प्रकाशमान ठेवणे, पाळीव प्राण्यांना रात्री बंदिस्त जागी ठेवणे यांसारख्या प्रतिबंधात्मक उपायांवर भर देण्यात आला.विद्यार्थ्यांना मार्गदर्शन करताना, शाळेत येताना-जाताना किंवा खेळताना नेहमी गटाने चालण्याचे, आवाज करत चालण्याचे, आणि ऊसाच्या शेतातून किंवा निर्जन आड रस्त्याने जाणे टाळण्याचे सक्त निर्देश देण्यात आले. बिबट्या प्रत्यक्ष दिसल्यास न घाबरता, पाठ न दाखवता, आरडाओरडा करून हळूहळू मागे सरकण्याच्या सूचनाही देण्यात आल्या.विद्यार्थी सुरक्षेसोबतच, या मेळाव्यात शाळेच्या भौतिक सुविधा याबद्दल ही सविस्तर चर्चा करण्यात आली. यामध्ये प्रामुख्याने जुन्या व मोडकळीस आलेल्या अंगणवाडी इमारतीचे निर्लेखन करणे, जुन्या शाळा इमारतीतील निरुपयोगी लाकडी वस्तूंचा लिलाव करणे आणि शाळेच्या तार कंपाऊंडच्या परिसरातील काटेरी झुडपे तोडून स्वच्छता ठेवण्याबाबत चर्चा झाली.याचबरोबर, विद्यार्थी सुरक्षेसंदर्भात 'चाईल्डलाईन १०९८' या हेल्पलाईन क्रमांकाची सविस्तर माहिती विद्यार्थ्यांना देण्यात आली. मेळाव्यात मुख्याध्यापक नवनाथ सूर्यवंशी आणि सरपंच दिपक चौधरी यांनी उपस्थितांना सविस्तर मार्गदर्शन केले.या महत्त्वपूर्ण मेळाव्यासाठी सरपंच दिपक चौधरी, शाळा व्यवस्थापन समितीचे अध्यक्ष निलेश रणशूर, आरोग्य अधिकारी विशाल तनपुरे, अंगणवाडी सेविका वनिता चौधरी, ग्रामपंचायत सदस्य सुरज रणशूर, शंकर रणशूर, माजी सरपंच नानासाहेब चौधरी, दत्ता पवार,संदिप थोरात, कविता मोरे, पगारे ताई यांच्यासह शाळेचे मुख्याध्यापक नवनाथ सूर्यवंशी, सहशिक्षिका वैशाली सोनवणे, पालक, ग्रामस्थ व विद्यार्थी मोठ्या संख्येने उपस्थित होते.कार्यक्रमाच्या शेवटी, सहशिक्षिका वैशाली सोनवणे यांनी उपस्थितांचे आभार मानले.
